Ístöltið "Þeir allra sterkustu" 2011 - A-úrslit

Halldór Guðjónsson og Nátthrafn frá Dallandi sigruðu ístöltið “Þeir allra sterkustu” sem fram fór í skautahöllinni í Laugardal í kvöld, þriðja árið í röð. Einkunnirnar sem Halldór og Nátthrafn hlutu í A-úrslitum báru merki þess að þeir félagar hafi nær fullkomnað töltsýningu sína, þeir fengu aldrei undir 9 í einkunn og fyrir hægt tölt gaf eitt dómarapar þeim félögum fullt hús stiga. Lokaeinkunn þeirra var 9,22, langt á undan öðrum keppendum, sem voru þó stórglæsilegir.

Sigurður Sigurðarson og Kjarnorka frá Kálfholti hlutu 8,78 og annað sæti og glæsiparið Sara Ástþórsdóttir og Díva frá Álfhólum hlutu 8,56 í einkunn og þriðja sætið.

Úrslit urðu eftirfarandi:

1. Halldór Guðjónsson og Nátthrafn frá Dallandi – 9,22

2. Sigurður Sigurðarson og Kjarnorka frá Kálfholti – 8,78

3. Sara Ástþórsdóttir og Díva frá Álfhólum – 8,56

4. Hinrik Bragason og Sveigur frá Varmadal – 8,22

5. Þorvaldur Árni Þorvaldsson og Smyrill frá Hrísum - 7,94