39 knapar sýndu 10 hross eða fleiri í ár

Ræktunarstarf íslenska hestsins er samspil margra þátta og þeir knapar sem sýna kynbótahross leika þar stóran þátt við það að koma hrossunum á framfæri. Á meðal hlutverka þeirra er að sýna allt það besta sem hesturinn býr yfir og þannig aðstoða dómara við það að festa hendi á það hvaða eiginleikar búa í hverjum grip svo að framfarir verði í ræktuninni.

Alls sýndu 39 knapar 10 hross eða fleiri í ár till fullnaðardóms í kynbótadómi og hér fyrir neðan er að sjá lista yfir þá þar sem sjá má fjölda hrossa, meðalaldur þeirra og meðaltal aðaleinkunnar en hún miðast við hæsta dóm hvers grips.

Árni Björn Pálsson sýndi flest hross í ár eða 73 talsins, skammt á hæla hans kemur Þorgeir Ólafsson með 62 hross og Þórður Þorgeirsson sýndi 40 hross.

Jakob Svavar Sigurðsson er með hæsta meðaltal aðaleinkunnar af þessum knöpum en hann sýndi alls 14 hross í ár og er meðaltals einkunn þeirra 8,31. Á eftir honum kemur Hans Þór Hilmarsson með 14 sýnd hross og er meðaltal einkunnar þeirra 8,27.  Á eftir þeim koma svo nokkrir knapar jafnir með meðaltal aðaleinkunnar upp á 8,25 en það eru Árni Björn Pálsson, Helga Una Björnsdóttir, Þorgeir Ólafsson og Þórarinn Eymundsson.