Knapar og lið í Meistaradeildinni

4. janúar 2024
Fréttir

Meistaradeild Líflands í hestaíþróttum hefur göngu sína 25. janúar á keppni í fjórgangi.

Deildin er ekki fullskipuð í ár en einungis sjö lið taka þátt í deildinni þennan veturinn.

Top Reiter vann liðakeppnina í fyrra og er liðið óbreytt. Hjarðartún er einnig með óbreytt lið frá því í fyrra en liðskipan liðanna má sjá hér fyrir neðan.

Auðsholtshjáleiga hætti með lið í deildinni og kom ekkert nýtt lið í staðinn. Einhverjir knapar úr liði Auðsholtshjáleigu eru komnir í önnur lið en Daníel Gunnarsson og Sara Sigurbjörnsdóttir eru komin í lið Ganghesta/Margrétarhofs. Úr því liði fór Glódís Rún Sigurðardóttir yfir í lið Hestvits/Árbakka og Reynir Örn Pálmason hætti í deildinni. Fredrica Fagerlund er einnig ný í liði Hestvits en Hulda Gústafsdóttir og Hinrik Bragason eru hætt í deildinni.

Lið Storm Rider/Austurkots er komið með nýtt nafn og heitir nú Austurkot/Pula. Þar hafa orðið knapaskipti en í stað Matthíasar Kjartanssonar, Hafþórs Hreiðars Birgissonar og Kristófers Darra Sigurðssonar koma nýir í liðið Hanna Rún Ingibergsdóttir, Jón Ársæll Bergmann og Ólafur Andri Guðmundsson.

Hrímnir/Hest.is er nánst óbreytt fyrir utan að Ásmundur Ernir Snorrason er kominn í liðið en hann var áður í liði Auðsholtshjáleigu.

Tveir nýjir knapar eru í liði Þjóðólfshaga/Sumarliðabæjar en Guðmar Þór Pétursson og Guðmundur Björgvinsson eru komnir í staðinn fyrir Mette Mannseth og Ólaf Ásgeirsson.

Allir knaparnir sem eru að koma nýir inn í deildina í ár hafa einhvern tímann áður keppt í Meistaradeildinni fyrir utan Jón Ársæl Bergmann.