Töffari efstur á Hólum

Síðsumarssýning kynbótahrossa fór fram á Hólum í Hjaltadal nú vikunni þar sem sýnd voru 67 hross og þar af 52 í fullnaðardómi. Dómarar voru þau Guðlaugur Antonsson, Arnar Bjarki Sigurðarson og Halla Eygló Sveinsdóttir.

Athygli vakti að ekki var notast við hina eiginlegu kynbótabraut á Hólum heldur skeiðbrautina við hringvöllinn. Samkvæmt heimildum Eiðfaxa er það komið til vegna þess að skipt var um efni að hluta til á kynbótabrautinni nú nýlega og þótti hún ekki hæf til sýninga.

Hæst dæmda hross sýningarinnar var sex vetra gamall stóðhestur, Töffari frá Hvalnesi, sýnandi hans var Egill Þórir Bjarnason sem jafnframt er ræktandi hans en eigendur eru Guðrún Elín Egilsdóttir og Hvalnesbúið ehf. Töffari er undan Hágangi frá Narfastöðum og Dís frá Hvalnesi. Hlaut hann 8,25 fyrir sköpulag, 8,43 fyrir hæfileika og í aðaleinkunn 8,37.

Hæst dæmda hryssan var Hekla frá Efri-Fitjum, 6.vetra gömul undan Arði frá Brautarholti og Hrinu frá Blönduósi. Ræktendur hennar eru Tryggvi Björnsson og Miðsitja ehf. Eigendur eru Tryggvi Björnsson, Magnús Andrésson og Anna Christine Ulbæk. Sýnandi hennar var Þórarinn Eymundsson. Hekla hlaut fyrir sköpulag 8,50, fyrir hæfileika 8,28 og í aðaleinkunn 8,36.

Eitt hross hlaut einkunnina 9,5 fyrir einstaka eiginleika í hæfileikum en það var Lukka frá Breiðholti Gbr, sem hlaut 9,5 fyrir skeið, hún er undan Ómi frá Kvistum og Hrund frá Torfunesi. Sýnandi hennar var Þórarinn Eymundsson.

Hross á sýningunni raðað eftir aðaleinkunn.