Tólf hryssur hljóta heiðursverðlaun í ár

Nýtt kynbótamat birtist í Worldfeng í gær. Samkvæmt því stefnir í að tólf hryssur bætist í hóp þeirra sem heiðursverðlauna hafa hlotið fyrir afkvæmi. Til að hljóta heiðursverðlaun þarf hryssa að hafa að lágmarki 116 stig í aðaleinkunn kynbótamats eða aðaleinkunn kynbótamats án skeiðs og að eiga að minnsta kosti fimm sýnd afkvæmi.

Hryssurnar verða heiðraðar þegar hin árlega fagráðsstefna hrossaræktarinnar fer fram laugardaginn 8.nóvember.

Röðun þeirra ræðst af aðaleinkunn og því ljóst að Álfhildur frá Syðri-Gegnishólum stendur efst heiðursverðlaunahryssa í ár með 128 stig í aðaleinkunn og verður með því Glettubikarshafi. Álfhildur er undan Orra frá Þúfu og Álfadísi frá Selfossi en ræktandi hennar og eigandi er Olil Amble. Álfhildur fetar þar með í fótspor móður sinnar sem hlaut heiðursverðlaun fyrir afkvæmi árið 2011 og fjölmargra systkina sinna sem hlotið hafa afkvæmaverðlaun að ógleymdum föður hennar, Orra frá Þúfu, sem hlaut heiðursverðlaun einnig og fjöldi afkomenda hans.

Hryssurnar sem hljóta heiðursverðlaun í ár má sjá hér fyrir neðan en vert er einnig að minnast þess að þær María frá Feti, Hrund frá Ragnheiðarstöðum og Þrift frá Hólum hefði líka hlotnast þessi heiður í ár væru þær á lífi. Þá er ein hryssa stödd erlendis sem náð hefur þessum áfanga en það er Garún frá Árbæ.

Heiður ræktenda og eigenda þessara hryssa er mikill. Til þess að ná þessum áfanga þarf að leggja á sig mikla vinnu fyrst við að para hryssurnar, koma afkvæmum þeirra á legg, til tamningar og svo sýninga. Starfsfólk Eiðfaxa vill því óska öllum þeim til hamingju með áfangann.

Heiðursverðlaunahryssur ársins 2025

*Birt með fyrirvara um mannleg mistök höfundar fréttar.