Frábær hross á Hólum

Kynbótasýningu á Hólum í Hjaltadal lauk nú í kvöld með yfirlitssýningu en alls voru sýnd 78 hross á sýningunni. Mörg frábær hross komu fram bæði yngri og eldri.

Vegur frá Kagaðarhóli er hæst dæmda hross sýningarinnar en hann hlaut fyrir hæfileika 9,03 fyrir sköpulag 8,39 og í aðaleinkunn 8,81. Hann hlaut þrjár „níu fimmur“ fyrir tölt, hægt tölt og samstarfsvilja. Vegur er tíu vetra gamall en ræktendur hans eru Víkingur Gunnarsson og Guðrún Stefánsdóttir en meirihluta eigandi er Hestavegferð ehf. Vegur er undan Seið frá Flugumýri II og Óperu frá Dvegsstöðum en sú var undan Kveik frá Miðsitju og Hrafnsdótturinni Hörpu frá Torfastöðum. Sýnandi á Vegi var Þórarinn Eymundsson

Leynir frá Garðshorni á Þelamörk var hæst dæmdi fjögurra vetra stóðhestur ársins í fyrra en hann virðist hafa þroskast vel í vetur og kom vel stemmdur til leiks ásamt knapa sínum Agnari Þór Magnússyni en hann er ræktandi ásamt konu sinni Birnu Tryggvadóttur Thorlacius en það eru Sporhestar ehf sem eru eigendur.

Leynir hlaut fyrir hæfileika 8,88 fyrir sköpulag 8,58 og í aðaleinkunn 8,77. Hlaut hann m.a. 9,5 fyrir samstarfsvilja og 9,0 fyrir tölt,brokk,skeið, fegurð í reið, bak og lend og háls,herðar og bóga. Leynir er undan Höfðingja og Grósku sem bæði eru frá Garðshorni á Þelamörk. Alls voru sýndir fjórir ungir stóðhestar frá Garðshorni á Þelamörk og allir hlutu þeir 1.verðlaun.

Þór frá Torfunesi stóð efstur fimm vetra stóðhesta á Landsmóti 2018 og hann sýndi flotta takta á Hólum. Hlaut fyrir sköpulag 8,84, fyrir hæfileika 8,67 og í aðaleinkunn 8,73. Hlaut hann m.a. 9,5 fyrir samstarfsvilja og skeið. Knapi á honum var Gísli Gíslason en ræktandi er Baldvin Kr. Baldvinsson en eigandi er Torfunes ehf.

Hæst dæmda hryssa sýningarinnar er Þrá frá Prestsbæ sem er sex vetra gömul undan Arion frá Eystra-Fróðholti og Þóru frá Prestsbæ. Hún hlaut fyrir sköpulag 8,40 fyrir hæfileika 8,69 og í aðaleinkunn 8,59. Þá hlaut systir hennar einnig háan dóm, Álfamær frá Prestsbæ, en sú er undan Þóru og Spuna frá Vesturkoti hlaut hún m.a. 9,5 fyrir skeið. Sýnandi á þessum hryssum var Þórarinn Eymundsson en ræktendur eru Inga & Ingar Jensen.