Bannað að keyra hestvagn vegna grænkera
Bettinu var vitanlega brugðið og hafa margir tekið upp hanskann fyri hana og hennar starfsemi.
Ástæða takmörkunarinnar er að sögn Bettinu sú að Veganbúðin, sem staðsett er í Strandgötu þar sem Bettina og hestarnir aka venjulega framhjá, er mótfallin því að Bettina aki um með hestana á meðan búðin er opin.
Vegan lífstíll, eða á góðri íslensku grænkeralífstíll, er mótfallinn því að dýr séu notuð manninum til hagsbóta. Grænkerar velja að neyta ekki dýraafurða eða nota þær í öðrum tilgangi og eru margir hverjir andstæðir dýrahaldi eða notkun mannfólks á dýrum.
„Veganbúðin hélt fund með Jólaþorpinu í gær og eftir það fékk ég fréttirnar,“ segir Bettina í samtalið við Mbl.
Ætlar samt að mæta
Bettina var þó á leiðinni í bæinn þegar blaðamaður náði tali af henni.
„Ég ætla að mæta í Jólaþorpið á eftir en ég á ekki að keyra áður en Veganbúðin lokar. Ég ætla nú samt að vera mætt með hestana vegna þess að fólki finnst gaman að sjá þá.“
Bettina segir augljóst að Jólaþorpið tapi á því ef hún mætir ekki á svæðið. „Jólaþorpið sjálft er að biðja mig um að mæta því þau vita náttúrulega að þau tapa miklu á því ef ég mæti ekki því þetta er það vinsælt. Þau vilja að ég mæti en ég á ekki að keyra fyrr en Veganbúðin er lokuð.“
Átta búðir sendu tölvupóst til stuðnings Bettinu
Bettina segir sárast að einhverjir telji að um dýraníð sé að ræða.
„Eitt það leiðinlegasta sem hægt er að segja um mig er að segja að ég fari illa með dýrin. Þá segi ég hingað og ekki lengra því það er eitthvað sem ég þoli ekki, það er alveg á hreinu. Ég myndi ekki standa í þessu ef þetta færi illa með hestana mína.“
Fjöldi fólks hefur tekið upp hanskann fyrir Bettinu, þar á meðal aðrir verslunareigendur á Strandgötu en átta verslanir þar hafa sent Jólaþorpinu tölvupóst til stuðnings Bettinu sem er orðlaus yfir því.
„Ég þekki ekki allt fólkið sem hefur stutt mig. Mér finnst það æðislegt, ég sat bara heima og felldi tár yfir því í gær,“ segir Bettina og hlær. „Ég veit að það er fullt af fólki sem kemur ár eftir ár og þekkir hrossin mín svo mér finnst þetta bara magnað.“