Ein yfir níu og tvö önnur alveg við níuna í hæfileikum

Yfirliti á vorsýningu á Gaddsstaðaflötum lauk í dag. Sýningin hófst á mánudaginn en sýnd voru 133 hross, 117 hlutu fullnaðardóm þar af 61 fyrstu verðlaun. Dómarar á sýningunni voru þau Elsa Albertsdóttir, Elisabeth Jansen og Gísli Guðjónsson.

Álfamær frá Prestsbæ stendur efst á sýningunni en hún hlaut í aðaleinkunn 8,87, fyrir sköpulag 8,59 og fyrir hæfileika 9,02. Það var Árni Björn Pálsson sem sýndi hryssuna en hún hlaut m.a. 10 fyrir skeið á yfirlitinu í dag.

Álfamær frá Prestsbæ, knapi Árni Björn Pálsson. Mynd: Nicki Pfau

Annar á sýningunni er Sindri frá Hjarðartúni með 8,74 í aðaleinkunn. Það munaði litlu að hann færi yfir níu fyrir hæfileika en á yfirliti í dag hækkaði hann einkunn fyrir tölt, skeið, brokk, hægt tölt og samstarfsvilja og endaði í 8,98 fyrir hæfileika en hann er með 8,28 fyrir sköpulag. Sindri er sjö vetra og var sýndur af Hans Þór Hilmarssyni.

Kastanía frá Kvistum var líka nálægt níunni í hæfileikum en hún endaði í 8,92 fyrir hæfileika en fyrir sköpulag er hún með 8,11 sem gerir 8,64 í aðaleinkunn. Kastanía er sjö vetra og var sýnd af Árna Birni Pálssyni.

Kastanía frá Kvistum, knapi Árni Björn Pálsson. Mynd: Nicki Pfau

Skarpur frá Kýrholti fór í flottan dóm, klárhestur, með 8,60 í aðaleinkunn. Fyrir sköpulag hlaut hann 8,61 og fyrir hæfileika 8,59, fyrir hæfileika án skeiðs hlaut hann 9,25. Skarpur var sýndur af Jakobi Svavar Sigurðssyni

Skarpur frá Kýrholti, knapi Jakob Svavar Sigurðsson Mynd: Sabine Girke

Þriðji á sýningunni varð Gandur frá Rauðalæk en hann hækkaði fyrir skeið á yfirlit og endaði með 8,65 fyrir hæfileika og 8,72 í aðaleinkunn. Hann hlaut hæstu sköpulags einkunnina á sýningunni eða 8,84 og setti heimsmet í hæð á herðar en hann mældist 157 cm. á herðar. Sýnandi var Guðmundur F. Björgvinsson

Gandur frá Rauðalæk hlaut 8,84 fyrir sköpulag.

Hrossin sem sýnd voru á Hellu, raðað eftir aðaleinkunn