Erlendir knapar kynnast íslenska hestinum

Um er að ræða heimildarþátt sem fylgir eftir fjórum erlendum knöpum og áhrifavöldum sem komu til Íslands til að kynnast íslenska hestinum í sínu náttúrulega umhverfi. Þátturinn byggir á reynslu þeirra af því að læra að ríða tölt á íslenskum hestabúum, undir leiðsögn reyndra þjálfara og fagfólks.

Í gegnum dvöl þeirra á nokkrum hestabúum fá áhorfendur innsýn í daglegt líf í kringum íslenska hestinn: þjálfun, ræktun, hefðir og sérstaka geðslagið sem einkennir hestinn og tengsl hans við fólkið sem vinnur með honum. Frásögnin er reynslumiðuð og byggir á raunverulegum samskiptum, athugunum og viðtölum, án sviðsetningar eða handrits.

Aðalmarkmið verkefnisins er að setja íslenska hestinn í sviðsljósið með því að sýna hann í gegnum fersk augu knapa sem höfðu ekki áður reynslu af honum. Þátturinn nálgast viðfangsefnið með virðingu og trúverðugleika og er ætlaður jafnt þeim sem þekkja íslenska hestinn vel sem nýjum áhorfendum.

Þátturinn var unninn af Eiðfaxa í tengslum við verkefnið Horses of Iceland, sem er hýst hjá Íslandsstofu.