Fjölmargir stóðhestar að skila myndarlegum afkvæmum

Þegar kynbótasýningum er lokið er hægt, með hjálp WorldFengs, að setjast niður og reikna út hin ýmsu meðaltöl hrossaræktendum til gagns og gamans.

Eiðfaxi ætlar nú að skoða meðaltal einkunna afkvæma stóðhesta. Þetta hefur verið gert hér á Eiðfaxa síðustu tvö ár og hefjum við yfirreið okkar á því að skoða þá stóðhesta sem áttu 4-9 sýnd afkvæmi á árinu í fullnaðardómi og rýna í meðaltöl þeirra eiginleika sem dæmdir eru í sköpulagi ásamt meðaltalseinkunn sköpulags afkvæma þeirra, en hestunum er raðað eftir þeirri einkunn.

Alls eru þetta 52 stóðhestar sem eiga 4 – 9 sýnd afkvæmi á árinu.

Undan Lexusi frá Vatnsleysu komu fjögur afkvæmi til dóms og var meðaltal sköpulags einkunnar þeirra hæst í þessu úrtaki eða 8,47. Þá hlutu þau að meðaltali 8,88 fyrir háls, herðar og bóga sem er hæsta meðaltalið en meðalaldur afkvæma hans var 6,8 ár.

Afkvæmi Vökuls frá Efri-Brú eru með næst hæsta meðaltal sköpulagseinkunar eða 8,44. Hann átti sex sýnd afkvæmi á árinu og var meðalaldur þeirra 5,7 ár. Þá hlutu þau að meðaltali 8,92 fyrir samræmi sem er hæsta meðaltal fyrir þann eiginleika.

Þegar rýnt er í meðaltalseinkunnir afkvæma þessara stóðhesta má sjá að Þráinn frá Flagbjarnarholti á yngstu afkvæmin sem komu til dóms á árinu en meðalaldur þeirra var 4 ár og undan honum komu fimm afkvæmi til dóms. Þá hlutu þau að meðaltali 8,50 fyrir höfuð sem er hæsta meðaltalið fyrir þann eiginleika.

Sólon frá Skáney á þau afkvæmi sem hæsta einkunn hlutu að meðaltali fyrir bak og lend og prúðleika. Meðaltal einkunnar afkvæma hans fyrir bak og lend var 8,72 og meðaltal einkunnar fyrir prúðleika var 8,50. Afkvæmi Múla frá Bergi hlutu einnig 8,50 fyrir prúðleika svo þeir deila efsta sætinu fyrir þann eiginleika.

Þeir Framherji frá Flagbjarnarholti, Toppur frá Auðsholtshjáleigu og Dagfari frá Álfhólum eru jafnir hvað eiginleikann réttleika varðar með 8,14 í meðaltalseinkunn afkvæma. Allir áttu þeir sjö dæmd afkvæmi á árinu í fullnaðardómi.

Afkvæmi Gríms frá Efsta-Seli eru með hæstu meðaltalseinkunn á fótagerð en hún er 8,75 og á hann 4 fullnaðardæmd afkvæmi á árinu.

Þeir Kjerúlf frá Kollaleiru og Lord frá Vatnsleysu voru báðir með 5 sýnd afkvæmi í fullnaðardómi og var meðaltals einkunn fyrir hófa 8,70 sem er það hæsta í þessum eiginleika. Afkvæmi Kjerúlfs voru einnig hæst fyrir réttleika með 7,90 í meðaltal.

Ef skoðaðar eru einnig ýmsar upplýsingar varðandi meðaltöl mælinga afkvæma þessara stóðhesta kemur í ljós að afkvæmi Vökuls frá Efri-Brú mælast að meðaltali hæst eða 147,8 cm en hann er einnig að skila mestri fótahæðinni eða 17,8 cm.

Framhæð er eiginleiki sem alltaf er að verða eftirsóttari en hann segir okkur meðaltalið á muninum á hæð á herðum og hæð á lend í cm. Af þeim stóðhestum í þessu úrtaki er Narri frá Vestri-Leirárgörðum að skila mestri framhæð eða 7,2 cm.

Hér fyrir neðan má sjá meðaltals einkunnir afkvæma þessarra stóðhesta í öllum eiginleikum dæmdum í sköpulagi.

ATH: Hægt er að færa sig fram og til baka á töflunni til þess að sjá alla eiginleika.

Hér fyrir neðan má sjá meðaltal mælinga á afkvæmum þessarra stóðhesta raðað eftir hæð á herðum.