Gæði og spenna í gæðingalist Meistaradeildar KS

Þremur greinum af átta er lokið í Meistaradeild KS og annað kvöld, miðvikudaginn 25.mars, verður keppt í þeirri fjórðu og er það Gæðingalist. Keppt er í Svaðastaðahöllinni á Sauðárkróki og hefst keppni klukkan 18:00, Haf og Land býður gestum frítt á mótið og þeim sem ekki eiga heimangengt gefst kostur á að horfa í beinni útsendingu á EiðfaxaTV.

Fyrstu þrjú keppniskvöldin hafa verið skemmtileg og spennandi þar sem áhorfendur hafa fengið að sjá ný og spennandi keppnispör í bland við eldri og reyndari. Á því verður áframhald þegar keppt er í gæðingalist og er hestakostur knapa góður.

Eins og staðan er nú er það Vera Schneiderchen sem leiðir í einstaklingskeppninni með 22 stig en skammt á eftir henni er liðsfélagi hennar Þórarinn Eymundsson með 21 stig í þriðja sæti er svo Mette Mannseth með 15 stig. Þær Vera og Mette eru skráðar til leiks á þeim hestum sem flestum stigum hafa skilað þeim í vetur því Vera er á Feyki frá Selfossi, þau unnu keppni í fjórgangi og voru í úrslitum í slaktaumatölti. Mette er á Töfra frá Þúfum, en þau riðu bæði til úrslita í slaktaumatölti og fimmgangi. Metta er ríkjandi sigurvegari því hún og Hannibal frá Þúfum stóðu efst í sterkri keppni á síðasta ári með 8,37 í einkunn.

Í liðakeppni er það lið Hrímnis með leiðir með 194,5 stig í öðru sæti er Hofstorfan/550 með 180 stig og í þriðja sætinu er lið Þúfna með 161,5 stig.

Að þessu móti loknu má segja að línur fari að skýrst í heildarstigakeppni og því fróðlegt að fylgjast með þessum vösku knöpum takast á við keppni í gæðingalist.

Ráslisti