Gæðingalist á föstudag

Það styttist í næstu grein í Meistaradeild Líflands í hestaíþróttum en á föstudaginn verður keppt í gæðingalist. Líkt og áður fer keppni fram í HorseDay höllinni á Ingólfshvoli og hefst keppni kl. 19:00.

TopReiter býður gestum frítt í stúkuna og verður hlaðborðið á sínum stað en þeir sem panta fyrirfram tryggja sér frátekið sæti í stúkunni. HÉR er hægt að panta á hlaðborðið.

Það var Ásmundur Ernir Snorrason sem vann greinina í fyrra á Hlökk frá Strandarhöfði en Ásmundur er efstur að stigum í einstaklingskeppninni og yrðu það dýrmæt 12 stig í pottinn ef hann endurtæki leikinni.

Sýnt verður beint frá mótinu á EiðfaxaTV.

Meistaradeildin er ekki það eina sem er á dagskrá í þessari viku en á miðvikudaginn verður bein útsending frá Blue Lagoon mótaröðinni, á fimmtudaginn frá Samskipadeildinni, áhugamannadeild Spretts, og á sunnudaginn verður sýnt frá Meistaradeild Líflands og æskunnar.