Hnokki er líklega “once in a life time hestur”

Fréttir bárust af því í dag að einn hæst dæmdi klárhestur landsins hafi skipt um eigendur, þegar hjónin Gitte og Flemming Fast festu kaup á Hnokka frá Eylandi.

Hnokki er átta vetra gamall, undan heiðursverðlaunahestinum Álfi frá Selfossi og fyrstu verðlauna hryssunni Hnátu frá Hábæ. Hnokki hefur hlotið 8,52 í aðaleinkunn. Hann hlaut m.a. 9,5 fyrir tölt, brokk, stökk og samstarfsvilja, 9,0 fyrir hægt tölt, hægt stökk og fegurð í reið, sýndur af Helgu Unu Björnsdóttur.

Eiðfaxi setti sig í samband við ræktendur Hnokka þau Davíð Matthíasson og Rut Skúladóttir og spurði þau útí söluna.

”Það er komið að vissum kaflaskiptum fyrir okkur þar sem Flemming og Gitte Fast hafa fest kaup á Hnokka.  Við erum mjög ánægð með að klárinn lendi í metnaðarfullum höndum og enn glaðari með að Helga Una fái að halda áfram sinni vegferð með Hnokka en þau hafa staðið sig frábærlega saman.

Hnokki hefur veitt okkur ómælda ánægju síðustu ár, staðið sig frábærlega bæði á kynbótabrautinni og keppnisvellinum.  Hnokki er með einstakt geðslag og hreyfieðli ásamt gæðum á öllum gangtegunum. Fyrir okkur er Hnokki líklega “once in a life time hestur”. Þeir eru ekki margir stóðhestarnir sem hafa farið í topp kynbótadóm með heila 9.26 fyrir hæfileika sem klárhestur þar af fjórar 9.5ur.  Ásamt því að standa afar vel á keppnisbrautinni strax kornungur. Helga Una og Hnokki urðu önnur í T2 með 8.56 og þriðju í fjórgang með 7.70 á Íslandsmóti í hestaíþróttum á Hólum í sumar.