Hrókeringar á landsliðshópi Íslands

Landslið Íslands fyrir Heimsmeistaramótið í Sviss er nú fullskipað.  Sigurbjörn Bárðarson kynnti landsliðið í síðustu viku og hélt þá einu sæti eftir en í viðtalinu hér að neðan fer hann yfir endanlegan hóp sinn en töluverðar hrókeringar hafa orðið á honum.

Breytingarnar eru þær að heimsmeistararnir Jóhanna Margrét Snorradóttir og Sara Sigurbjörnsdóttir skipta báðar um hesta og Aðalheiður Anna Guðjónsdóttir á Hulinn frá Breiðstöðum kemur inn og fullkomnar þar með landsliðsvalið.

Jóhanna Margrét sem kynnt var á Kormáki frá Kvistum mætir til leiks á Össu frá Miðhúsum, þrælreyndri og magnaðri tölthryssu sem Gústaf Ásgeir hefur keppt á síðastliðinn ár við góðan orðstír. Endanlegt hestaval Söru kemur meira á óvart en hún mun keppa á hestinum Spuna vom Heesberg sem hefur verið einn magnaðasti slaktaumatöltshestur meginlands Evrópu síðastliðinn ár ásamt knapa sínum Daniel C. Schulz.

Hekla Katharína mun kynna endanlega liðskipan U-21 liðsins seinna í dag í viðtali hér á Eiðfaxa.

Í spilaranum hér að neðan fer Sigurbjörn Bárðarson, landsliðsþjálfari, yfir atburðarás síðustu daga og hugsanir sínar  á bak við lokavalið.

Endanlegur hópur Íslands fyrir HM

• Elvar Þormarsson & Djáknar frá Selfossi Fimmgangur F1 (ríkjandi heimsmeistari í gæðingaskeiði og 250 m. skeiði)
• Glódís Rún Sigurðardóttir & Snillingur frá Íbishóli Fimmgangur F1 (ríkjandi heimsmeistari í fimmgangi ungmennaflokki)
  
• Jóhanna Margrét Snorradóttir & Assa frá Miðhúsum Tölt T1 og fjórgangur V1 (ríkjandi heimsmeistari í tölti og samanlögðum fjórgangsgreinum)
  
• Sara Sigurbjörnsdóttir & Spuni vom Heesberg Tölt T2 (ríkjandi heimsmeistari í fimmgangi)
• Aðalheiður Anna Guðjónsdóttir og Hulinn frá Breiðstöðum Tölt og fjórgangur
• Árni Björn Pálsson & Kastanía frá Kvistum Tölt T1
• Daníel Gunnarsson & Kló frá Einhamri 250 m. og 100 m. skeið
• Hans Þór Hilmarsson & Ölur frá Reykjavöllum Fimmgangur F1, tölt T1 og gæðingaskeið PP1
• Helga Una Björnsdóttir & Ósk frá Stað Slaktaumatölt T2 og fjórgangur V1
• Hinrik Bragason & Trú frá Árbakka Gæðingaskeið PP1
• Sigursteinn Sumarliðason & Krókus frá Dalbæ 250 m. og 100 m. skeið