Jóhanna Margrét fékk FT fjöðrina

Jóhanna Margrét Snorradóttir hlaut FT fjöðrina fyrir sýningar sínar á Bárði frá Melabergi í fjórgangi og tölti í meistaraflokki.

Það var Sylvía Sigurbjörnsdóttir, formaður FT, sem afhenti henni fjöðrina og við tilefnið var lesinn upp eftirfarandi texti;

„Verðlaunin eru veitt fyrir einstaka útgeislun knapa og hests.
Hesturinn sé sjálfberandi, sterkur og mjúkur. Reiðmennska
einkennist af samspili og léttleika.

FT Fjöðrin er veitt á stærstu mótum keppnistímabilsins, Íslands- og Landsmótum.

Jóhanna Margrét Snorradóttir hlýtur FT fjöðrina fyrir sýningar sínar á Bárði frá Melabergi í fjórgangi og tölti meistara.

Stórkostleg útgeislun og glæsileiki einkenna þetta par. Það sópar að þeim þar sem þau koma fram. Reiðmennskan er frábær og þau dansa saman á vellinum sem eitt.

Jóhanna Margrét er fyrirmynd bæði innan vallar sem utan, kurteis og prúð.

Innilegar hamingjuóskir Jóhanna Margrét Snorradóttir þú ert
sannarlega vel að þessum verðlaunum komin.“