Katie útnefnd knapi ársins í Finnlandi
![](https://eidfaxi.is/wp-content/uploads/2024/03/371745991_848043490026510_699994483361716541_n-800x534.jpg)
Katie og Depill fra Fögruhlíð Ljósmynd: photohestur
Katie Sundin Brumpton var útnefnd knapi ársins fyrir árið 2023 í Finnlandi, af íslandshestasamtökunum þar í landi. Katie hefur verið sýnileg í keppni i mörg ár og er oftar en ekki þátttakandi á Heimsmeistaramótum íslenska hestsins. Hún starfar við hestamennsku í Svíþjóð ásamt manni sínum Daniel Sundin Brumpton.
Í samtali við Eiðfaxa hafði hún þetta að segja um árangur síðasta árs.
„Ég var mjög ánægð með mína frammistöðu á síðasta keppnisári, ég vann til bronsverðlauna í T1 á sænska meistaramótinu og var önnur í forkeppni í V1 á heimaræktuðum stóðhesti, Depli frá Fögruhlíð með 7,43 í einkunn. Þá sýndi ég einnig stóðhest úr okkar ræktun, Kolbein frá Fögruhlíð, í 1.verðlaun í kynbótadómi, og hann var þriðji hæst dæmdi stóðhesturinn í 6.vetra flokki í Svíþjóð. Heimsmeistaramótið fór ekki alveg eins og ég hafði ætlað mér en við Depill kepptum til B-úrslita í tölti sem var að sjálfsögðu gaman en við vorum langt frá okkar besta, þannig er þetta bara stundum.“