Kristján Árni leiðir og Sigursteinn annar í 250 metra skeiði

Fyrsta keppnisgrein dagsins var 250 metra skeið. Kappreiðarnar fóru fram í góðum aðstæðum veðurlega séð, 18 stiga hita og logni. Hver keppandi fékk tvo spretti í dag og seinni tveir sprettirnir fara svo fram seinni partinn á morgun, þá kemur í ljós hver stendur uppi sem heimsmeistari í greininni. Íslensku keppendurnir voru fimm talsins þeir Daníel Gunnarsson, Hinrik Bragason og Sigursteinn Sumarliðason í fullorðinsflokki og Kristján Árni Birgisson og Matthías Sigurðsson í ungmennaflokki.

Að loknum þessum tveimur sprettum er það Natalie Fischer frá Danmörku sem leiðir í fullorðinsflokki á tímanum 21,91 sekúndu. Hún keppir á hestinum Ímni fra Egeskov. Kristján Árni  og Krafla frá Syðri-Rauðalæk eru í forystu í ungmennaflokki á tímanum 22,38 sekúndum. Virkilega öruggir og flottir sprettir hjá þeim, Kristján virðist vera með hryssuna í hendi sér og nú er bara að klára dæmið á morgun.

Kristján og Krafla. Ljósmynd: Henk & Patty

Matthías keppir á Magneu frá Staðartungu og náðu þau best tímanum 25,10 sekúndum í dag eftir að hafa ekki hlotið tíma í fyrri spretti. Matthías hefur náð betri tímum og mun án vafa leggja allt í sölurnar á morgun. Hinrik sagði það í samtali við Eiðfaxa að loknu gæðingaskeiði að hann væri farinn að leiða hugann að kappreiðaskeiði. Þau Trú standa sig heldur betur vel í þeirri grein í fraumraun sinni og fóru í dag tvo góða spretti og sá betri er 22,64 sekúndur.

Hinrik og Trú. Ljósmynd: Henk & Patty

Daníel  og Kló frá Einhamri 2 eru öryggið uppmálað og til alls líkleg þeirra besti tími í dag 22,54 sem er sjötta sætið í fullorðinsflokki sem stendur. Hann náði silfri á síðasta HM og veit hvað þarf til þess að standa á palli í greininni, hann mun nýta þá reynslu á morgun.

Daníel og Kló. Ljósmynd: Henk & Patty

Sigursteinn og Krókus frá Dalbæ áttu góðan dag. Tóku fyrri sprettinn af miklu öryggi og gáfu svo meira í þann seinni, þrátt fyrir að hafa ekki verið í fullkomnu jafnvægi uppskáru þeir tímann 21,97 sekúndur sem er annað sætið sem stendur. Sigursteinn er mikill keppnismaður og mun ekki gefa neitt eftir á morgun.

10 efstu í fullorðinsflokki

Staðan í ungmennaflokki