Lena Maxheimer tók gullið til Þýskalands

Síðustu úrslit heimsmeistaramótsins voru í fimmgangi fullorðinna. Þar áttu Íslendingar tvo fulltrúa þau Elvar Þormarsson á Djáknari frá Selfossi og Glódísi Rún Sigurðardóttur á Snillingi frá Íbishóli.

Það varð Lena Maxheimer sem stóð uppi sem heimsmeistari á Abel frá Nordal með einkunnina 7,71 en þau leiddu einnig keppnina að forkeppni lokinni. Önnur varð landa hennar frá Þýskalandi, Frauke Schenzel á Óðni vom Habichtswald með einkunnina 7,64. Elvar varð þriðji og hlaut brons með einkunnina 7,17, jafn Anne Frank Andreasen á Vökli frá Leirubakka. Glódís Rún og Snillingur hlutu 7,02 og enduðu í fimmta sætinu.