Mathilde og Leana sigurvegarar

Það var mikið um dýrðir í Léttishöllinni á Akureyri í dag þegar fyrsta mótið í Áhugamannadeild Norðurlands fór þar fram. Óhætt er að fullyrða að deild þessi sé mikil lyftisstöng fyrir hestamennskuna á Norðurlandi sem sást bersýnilega á góðri mætingu áhorfenda og góðum sýningum knapa.

Mótið var sýnt í beinni útsendingu á EiðfaxaTV og er það okkur mikill heiður að fá að taka þátt í þessari deild með þeim hætti.

Stjórnarmenn LH heiðruðu mótið með nærveru sinni og voru það þær Linda Björk Gunnlaugsdóttir formaður LH og Þórhildur Katrín Stefánsdóttir varaformaður LH sem veittu verðlaun.

Keppt var bæði í fjórgangi minna vanir (V5) og fjórgangi meira vanir (V2).

Í flokki meira vanra knapa var keppnin æsispennandi og þurfti aukastafi til að skera úr um sigurvegara í A-úrslitum. Það fór þó svo að Mathilde Larsen og Staka frá íbishóli stóðu uppi sem sigurvegarar en jöfn henni að einkunn í 2.sæti varð Aldís Ösp Sigurjónsdóttir á Þulu frá Bringu.

Í fjórgangi minna vönum var það Leana Raphaela Haag sem bar sigur út býtum á Smásjá frá Tunguhálsi. Þær leiddu eftir forkeppni með einkunnina 6,43 og unnu svo nokkuð afgerandi sigur í A-úrslitum með 6,71 í einkunn.

Næsta mót verður haldið þann 15. mars í Svaðastaðahöllinni á Sauðárkróki þar sem keppt verðir í fimmgangi.

Heildarúrslit fjórgangs í Áhugamannadeild Norðurlands.