„Mjög gaman að vera til og ég mun lifa lengi á þessum sigri“

Lokakvöldið í Meistaradeild KS fór fram í gærkvöldi, föstudaginn 2 maí, í Svaðastaðahöllinni á Sauðárkróki þar sem keppt var í tölti og flugskeiði í gegnum höllina. Mikil spenna var fyrir kvöldinu um það hverjir stæðu uppi sem heildarsigurvegarar bæði í einstaklings og liðakeppni.

Kvöldið hófst á keppni í tölti þar sem Mette Mannseth og Hannibal frá Þúfum unnu með nokkrum yfirburðum. Þau hlutu 7,57 í einkunn í forkeppni og 7,94 í úrslitum. Annar varð Þórarinn Eymundsson á Náttfara frá Varmalæk með 7,72 í einkunn í úrslitum og í þriðja sæti varð Konráð Valur Sveinsson á Tvífara frá Varmalæk með 7,22 í úrslitum.

Konráð Valur og Kastor frá Garðshorni á Þelamörk voru svo á kunnulegum slóðum í flugskeiðinu og sigruðu keppinauta sína á tímanum 4,61 sekúndum. Annar varð Atli Freyr Maríönnuson á Elmu frá Staðarhofi á 4,86 sekúndum og í þriðja sæti Þórgunnur Þórarinsdóttir á Sviðri frá Reykjavík á 4,88 sekúndum.

Í heildarstigakeppni knapa var það Klara Sveinbjörnsdóttir, liðsmaður í liði  Líflands, sem stóð uppi sem sigurvegari eftir jafna og góða frammistöðu í vetur í flestum greinum.  Annar varð Guðmar Hólm Ísólfsson Líndal og í þriðja sæti Konráð Valur Sveinsson.

Í samtali við Eiðfaxa hafði Klara þetta um sigurinn að segja. „Ég þakka sigurinn frábærum hestakosti sem ég hafði úr að ráða í vetur.  Mínum eigin hestum þeim Hnotu og Gletti og einnig þeim þremur hryssum sem ég fékk lánaðar hjá Hólaskóla í vetur en það voru þær Druna, Mörk og Hrina. Þá er ég umvafinn frábæru fólki sem hefur stutt mig í einu og öllu í vetur. Í dag er mjög gaman að vera til og ég mun lifa lengi á þessum sigri.“

Lið Storm Rider vann heildarstigakeppni liða en liðsmenn þar eru þeir Elvar Einarsson liðsstjóri, Bergur Jónson, Bjarni Jónasson, Finnbogi Bjarnason og Þórarinn Ragnarsson.

Heildarniðurstöður í tölti

Niðurstöður í flugskeiði