Þórður með magnaða sýningu á Gormi

Forkeppni í A-flokki er lokið í Herning. Mjög margar góðar sýningar sáust þrátt fyrir rigningu og blauta velli.

Sé miðað við þessa upphafsdaga á Norðurlandamótinu að þá er það ljóst að gæðingakeppnin er síst á undanhaldi á Norðurlöndunum og hafa gæði hrossa verið góð í þeim flokkum sem lokið er.

Sýning Þórðar Þorgeirssonar stóð þó upp úr og einkunnir dómara eftir því. Er hann í öruggri forystu að forkeppni lokinni með 8,776 í einkunn. Gormur er hátt dæmdur stóðhestur undan Álfi frá Selfossi og Grágás frá Gýgjarhóli.

Jón Bjarni Smárson keppti einnig fyrir hönd Ísland á Skutli frá Hafsteinsstöðum og gerðu þeir vel, hlutu í einkunn 8,516 og sæti í B-úrslitum.

Í öðru sæti er Völsungur frá Skeiðvöllum, sýndur af Susanne Larsen Murphy, með einkunnina 8,688. Keppa þau fyrir hönd Danmerkur.

Í þriðja sæti að lokinni forkeppni er Laxnes frá Ekru, sýndur af Rasmus Møller Jensen, með einkunnina 8,672. Keppa þeir fyrir hönd Danmerkur.