Þórshamar hlaut 10 og nítján hross 9,5 fyrir bak og lend

Í þessum eiginleika er yfirlínan í baki og lend metin; stefnan og sveigjan í bakinu og lengd og halli lendarinnar. Einnig er lagt mat á breidd og vöðvafyllingu baksins, lengd og breidd spjaldhryggjar og lögun og vöðvafyllingu lendarinnar. Horft er til þess að munur á neðsta punkti í baki og hæsta punkt á lend sé ekki of mikill (viðmið: 4 – 6 cm).  Lögð er áhersla á að eiginleikinn nýtist í reið. Ef vafi leikur á stefnu og/eða sveigju í baki hvað varðar burð eða mýkt skal skoða hvernig hrossinu nýtist eiginleikinn í reið.

Einn hestur hlaut einkunnina 10,0 fyrir bak og lend í ár en það var Þórshamar frá Reykjavík, hann er undan Reginn frá Ketu sem er undan Kiljani frá Steinnesi. Kiljan stendur framarlega á meðal reyndra kynbótahesta í kynbótamatinu fyrir bak og lend. Móðir Þórshamars er Bót frá Reyðarfirði. Ræktandi hans er Leó Geir Arnarson.