Tvær hryssur hlutu 10 og 12 til viðbótar 9,5 fyrir stökk

Stökk skal sýnt á þeim mesta hraða þar sem hesturinn ræður við að ganga í jafnvægi, þar sem hraðaaukning frá hægu upp í mestu ferð er sýnd. Greinileg hraðaaukning í góðu jafnvægi getur vegið til hækkunar á einkunn og eins ef sýnd er jafnvægisgóð niðurhæging. Full sprettlengd er 150 metrar (75 metrar hjá fjögurra vetra hrossum).

Tvær hryssur hlutu 10,0 fyrir stökk á árinu en báðar eru þær sex vetra gamlar. Þetta voru Edda frá Rauðalæk og Díana frá Bakkakoti.  Edda er undan Kiljani frá Steinnesi og Elísu frá Feti en hún var sýnd af Guðmundi Björgvinssyni. Díana er undan Frama frá Ketilsstöðum og Brynju frá Bakkakoti og var sýnd af Jóni Ársæli Bergmann.