Góður árangur á Stórmóti Hrings

Stórmót Hrings fór fram um síðastliðna helgi á keppnissvæði félagsins í Hringsholti við Dalvík. Á mótinu var keppt í mörgum greinum íþróttakeppninnar og náðu margir knapar frábærum árangri.

Mette Mannseth var sigursæl á mótinu og vann fjórar greinar. Skálmöld frá Þúfum var fákur hennar í fjórgangi (V1) og tölti (T1). Í töltinu stóðu þær efstar með 8,28 í aðaleinkunn og í fjórgangi með 7,60. Mette heldur áfram að gera það gott á Kalsa frá Þúfum og er hann jafnvígur jafnt í íþrótta- og gæðingakeppni. Eftir drengilega baráttu við Þórarinn Eymundsson og Veg frá Kagaðarhóli  í fimmgangi (F1) sigraði Mette á sætaröðun dómara með 7,79 í einkunn líkt og Þórarinn. Mette og Vívaldi frá Torfunesi voru svo fljótust 100 metrana á 7,50 sekúndum sem er hreint frábær tími.

Bjarni Jónsson og Harpa-Sjöfn frá Hvolsvelli voru hlutskörpust í slaktaumatölti (t2) og hlutui 7,88 í úrslitum sem dugði til sigurst og rúmlega það.

Guðmar Freyr Magnússon bar sigur úr býtum í tölti ungmenna á Eldi frá Íbishóli og í gæðingaskeiði opnum flokki á Brimari frá Varmadal.

Hjördís Halla Þórarinsdóttir vann bæði tölt og fjórgang barna á Flipa frá Bergsstöðum. Systir hennar Þórgunnur Þórarinsdóttir gerði það sama og sigraði sömu greinar í unglingaflokki  í tölti á Dimmu frá Bjarnastöðum og í fjórgangi á Hnjúki frá Saurbæ. Hún bætti svo þriðja sigrinum við í fimmgangi unglinga á Takti frá Varmalæk.

Keppni í 250 metra skeiði sigraði Hjörleifur Helgi Sveinbjarnarson á Gjafari frá Hrafnsstöðum og í 150 metra skeiði var það Þórarinn Eymundsson og Gullbrá frá Lóni sem náðu bestum tíma.

Öll úrslit mótsins má skoða hér fyrir neðan.