Átta hross hlutu úrvalseinkunn fyrir hægt stökk

Hægt stökk skal sýnt á 100 metra kafla fyrir miðju brautar. Hraði á hægu stökki er um 7 m/sek. Fyrir hinar hærri einkunnir (9,0 eða hærra) þarf hesturinn að geta lyft sér upp í jafnvægisgott hægt stökk af feti eða milliferðar tölti/brokki. Sýning á bæði hægra og vinstra stökki sem og að hesturinn haldi jafnvægi og burði þegar slakað er á taum eru verkefni sem vegið geta til hækkunar á einkunn séu þau vel framkvæmd af hestinum.

Átta hross hlutu úrvalseinkunn fyrir hægt stökk í ár en þau voru öll sýnd á Íslandi. Ekkert þeirra hlaut einkunnina 10 heldur hlutu þau öll 9,5. Þeirra yngst er Ragna frá Sumarliðabæ 2 en hún er 4.vetra gömul. Þeir Draupnir frá Stuðlum og Kveikur frá Stangarlæk 1 eiga tvö afkvæmi á listanum.