Drög að dagskrá LM 2026

Fyrstu drög að dagskrá Landsmót hestamanna sem mun fara fram á Hólum sumarið 2026 hafa verið birt á vef mótsins, landsmot.is.

Mótið mun hefjast sunnudaginn 5.júlí á forkeppni í barnaflokki á gæðingavelli og á kynbótavellinum byrja 4ra vetra hryssur.  Mótinu lýkur svo laugardagskvöldið 11. júlí  með pompi og prakt.

Á síðasta LH þingi var samþykkt að A-flokkur ungmenna væri sýningagrein á Landsmóti og hefur verið tekin sú ákvörðun að bjóða uppá þessa grein á komandi Landsmóti ásamt því að B-flokkur áhugamanna kemur einnig inn sem sýningargrein.

Óskað er eftir því að hestamannafélögin bjóði því uppá A-flokk ungmenna og B-flokk áhugamanna í sínum úrtökum til að eiga gjaldgenga fulltrúa í þessar greinar á komandi Landsmóti.

Helstu reglur varðandi þátttakendur í B-flokki áhugamanna eru eftirfarandi:
– Knapi má EKKI hafa keppt í meistaraflokki á keppnisárinu.
– Skráður í B-flokk áhugamanna í úrtöku hjá sínu félagi.
– Miðast við aldur í fullorðinsflokki (22 ára og eldri).
– Öll félög mega senda 1 fulltrúa.
– Aðildafélög sem mega senda fleiri en einn fulltrúa í hefðbundinn flokk mega senda helmingi færri í áhugamannaflokkinn (félag sem má senda sex í hefðbundinn flokk eru gjaldgeng með þrjá o.s.frv.)

Nánari upplýsingar um hliðardagskrá, skemmtidagskrá og fleira verða birtar síðar. Fyrstu drög að dagskrá LM2026 má finna hér.