Hvaða stóðhestar eiga flest afkvæmi í gæðingakeppni á Landsmóti?

Þegar byrjað er að grúska er oft erfitt að hætta. Hér á Eiðfaxa birtist grein fyrir nokkrum dögum um feður keppnishrossa, byggt á þátttökuhrossum á Íslandsmótum síðustu tveggja ára í öllum aldursflokkum. Nú er sjónum beint að keppni í gæðingahluta Landsmóta. Greinarhöfundur ákvað þá að stækka úrtakið og nota til þess síðustu þrjú Landsmót, þ.e. árin 2018, 2022 og 2024.

Notast var við sömu aðferð og í fyrri grein með því að hreinsa gögnin þannig að hvert hross kæmi fyrir eingöngu einu sinni. Ekki er um vísindalega grein að ræða og því ekki farið í þá vinnu að skoða fleiri breytur en hversu mikinn fjölda afkvæma stóðhestar eiga. Greinarhöfundur hvetur þó þá sem vilja skoða þetta nánar að velta þessum hestum fyrir sér í Worldfeng og grúska sér til gagns og gamans. Í því samhengi er t.d. vert að velta fyrir sér aldri stóðhestanna og fjölda afkvæma þeirra á tamningaaldri á þessu árabili.

Arfleið Orra frá Þúfu sterk

Alls eru þau hross sem keppt hafa í gæðingakeppni á síðustu þremur Landsmótum 1178 talsins. Þar að baki liggja fimm keppnisgreinar: barna-, unlinga-, ungmenna, B- og A-flokkur. Alls eru það 448 stóðhestar sem eru feður þessara hrossa og styður það við hversu marga frambærilega stóðhesta er að finna á Íslandi. Líkt og í fyrri grein að þá er hér að neðan birtur listi yfir þá feður sem eiga 5 eða fleiri afkvæmi í þessu gagnasafni. Yfirburði Orra frá Þúfu í Landeyjum koma bersýnilega í ljós þegar sá listi er skoðaður því að af 10 efstu hestum er að finna fjóra syni hans, þá Álf frá Selfossi, Gaum frá Auðsholtshjáleigu, Sæ frá Bakkakoti og Svein-Hervar frá Þúfu, auk þess er Hágangur frá Narfastöðum dóttur sonur Orra. Þá er höfðinginn sjálfur, Orri, sá stóðhestur sem næst flest afkvæmi á þegar listinn  er skoðaður.

Sá sem flestum hrossum hefur skilað til keppni á Landsmótum síðustu ára er Álfur frá Selfossi með alls 27 afkvæmi. Hann er undan áður nefndum Orra og hinni mögnuðu gæðingamóður Álfadísi frá Selfossi. Annar á listanum er Orri sjálfur með 21 afkvæmi og þriðji er sonur hans Gaumur frá Auðsholtshjáleigu. Hann var sá stóðhestur sem efstur stóð á samantekt um Íslandsmót 2024 og 2025 og styður þetta því við að þar sé einn farsælasti keppnishestafaðir samtímans. Fjórði á listanum er svo Hróður frá Refsstöðum með 18 afkvæmi og með jafn mörg afkvæmi koma þar á eftir Sær frá Bakkakoti og Skýr frá Skálakoti með 17 afkvæmi. Yngstur þeirra stóðhesta sem eiga 10 afkvæmi eða fleiri er Konsert frá Hofi með 13 afkvæmi, fæddur árið 2010.

Listi fyrir stóðhesta sem eiga 5 afkvæmi eða fleiri á síðustu þremur Landsmótum

Rétt er að taka fram að samantekt þessi er til gamans gerð og með fyrirvara um mannleg mistök við vinnslu og hreinsun gagnanna. Ekki er útilokað að tími gefist til að kafa nánar í þessi mál og skoða feður hrossa í einstökum greinum næst, þar væri t.d. fróðlegt að velta fyrir sér feðrum keppnishrossa í skeiðgreinum.