Klassi efstur í Herning

Nú er öllum kynbótasýningum ársins lokið en alls voru þeir 1883 fullnaðardómarnir sem felldir voru í ár í 10 mismunandi löndum. Er það fjölgun um rúmlega 400 fullnaðardóma frá árinu í fyrra þegar 1471 fullnaðardómur voru felldir. Taka þarf þó mið af því að ekki var Landsmót á Íslandi í fyrra en Landsmótsár hafa alla jafna mikil áhrif á fjöla fullnaðardóma.

Yfirlitssýningu lauk nú áðan í Herning þar sem dómarar voru þau Þorvaldur Kristjánsson og Elisabeth Jansen. Alls mættu 21 hross til dóms og þar af 19 í fullnaðardóm.

Hæst dæmda hross sýningarinnar var fimm vetra gamall stóðhestur, Klassi frá Slippen. Hann var sýndur af ræktanda sínum og eiganda Jóhanni Rúnari Skúlasyni. Klassi er undan Garra frá Reykjavík og Köru frá Slippen. Fyrir sköpulag hlaut hann 8,24 og fyrir hæfileika 7,95 í aðaleinkunn 8,05. Klassi er klárhestur og hlaut hann m.a. einkunnina 9,0 fyrir hægt stökk og samstarfsvilja.

Af öðrum athyglisverðunm hrossum sem sýnd voru í Herning er vert að nefna tvær fjögurra vetra hryssur undan Evert frá Slippen. Þær heita Kamma og Dimma frá Slippen sýndar af Jóhanni Rúnari Skúlasyni, báðar tvær klárhryssur sem hlutu m.a. 9,0 fyrir samstarfsvilja.