Landssýning kynbótahrossa í beinu streymi

Áttatíu hæst dæmdu kynbótahross landsins ásamt stóðhestum með afkvæmaverðlaun verða sýnd í beinu streymi frá Gaddstaðaflötum við Hellu 27. júní.

• Landssýning kynbótahrossa verður haldin á Gaddstaðaflötum við Hellu 27. júní og verður beint streymi frá viðburðinum.
• Þátttökurétt eiga tíu hæst dæmdu kynbótahross vorsins, alls 80, í öllum flokkum, auk stóðhesta með afkvæmaverðlaun.
• Hestaáhugafólk um víða veröld getur horft á streymið í beinni útsendingu eða seinna á www.eidfaxi.is á íslensku, ensku eða þýsku.
• Hægt er að fylgjast með stöðunni hjá efstu hrossunum á WorldFengi

Félag hrossabænda, Ráðgjafarmiðstöð landbúnaðarins og Horses of Iceland, í samstarfi við Rangárbakka, þjóðarleikvang íslenska hestsins, blása til Landssýningar kynbótahrossa á Gaddstaðaflötum við Hellu, laugardaginn 27. júní og verður beint streymi frá viðburðinum.

Þátttökurétt í sýningunni eiga tíu hæst dæmdu kynbótahross vorsins í öllum flokkum hryssna og stóðhesta, alls 80 bestu hross landsins, auk stóðhesta með afkvæmaverðlaun. Hrossin verða kynnt ítarlega og verðlaunuð á grunni dóma vorsins.

Hestaáhugafólk um allan heim getur horft á streymið á eidfaxi.is og hlustað á lýsingar á íslensku, ensku eða þýsku. Streymið kostar 2.900 kr. Aðgangseyrir á Gaddstaðaflötum er 2.500 kr. en aðgangur er ókeypis fyrir börn yngri en 16 ára. Aðgangsmiðar eru seldir á staðnum.

Dagskrá

Nánari upplýsingar um dagskrá má finna með því að smella hér

Um Horses of Iceland

Tilgangur markaðsverkefnisins Horses of Iceland er að byggja upp orðspor íslenska hestsins um heim allan til að leggja grunn að aukinni verðmætasköpun og útbreiðslu hestsins á heimsvísu.

Íslandsstofa sér um framkvæmd verkefnisins og starfar með verkefnastjórn sem skipuð er fulltrúum úr hestasamfélaginu, Félagi hrossabænda (FHB), Landssambandi hestamannafélaga (LH), Félagi tamningamanna (FT), auk útflutningsaðila og fulltrúa frá Atvinnuvega- og nýsköpunarráðuneyti, Mennta- og menningarmálaráðuneyti og Samtökum ferðaþjónustunnar.

Vefsíða: www.horsesoficeland.is
Samfélagsmiðlar: Facebook, Instagram, Twitter, Pinterest, Tumblr

Nánari upplýsingar veitir Jelena Ohm, verkefnastjóri Horses of Iceland jelena@islandsstofa.is.