Nótt frá Ytri-Skógum efsta hross sýningarinnar

Kynbótasýningunni á Hellu lauk í dag en þetta er önnur vikan sem dæmt er á Rangárbökkum. Dómarar voru þeir Eyþór Einarsson, Gísli Guðjónsson og Heimir Gunnarsson en sýnd voru 57 hross og af þeim hlutu 46 fullnaðardóm.

Hæst dæmda hross sýningarinnar var sex vetra hryssan Nótt frá Ytri-Skógum undan Draupni frá Stuðlum og Gná frá Ytri-Skógum. Það var Hlynur Guðmundsson sem sýndi hryssuna sem hlaut 8,52 fyrir sköpulag og 8,55 fyrir hæfileika sem gerir 8,54 í aðaleinkunn. Nótt er undan Draupni frá Stuðlum og Gná frá Ytri-Skógum en eigandi og ræktandi er Ingimundur Vilhjálmsson.

Efstur af stóðhestum var Sóli frá Þúfu í Landeyjum en hann hlaut fyrir sköpulag 8,55 og 8,52 fyrir hæfileika sem gerir 8,53 í aðaleinkunn. Sóli er í eigu og ræktaður af Önnu Berglindi Indriðadóttur og Guðna Þór Guðmundssyni en það var Eygló Arna Guðnadóttir sem sýndi Sóla. Sóli er 8 vetra undan Sólon frá Skáney og Þöll frá Þúfu í Landeyjum.

Hér fyrir neðan eru hrossin sem sýnd voru á sýningunni.