Slaktaumtölt í Meistaradeild KS

Annað mótið í Meistaradeild KS fer fram annað kvöld, föstudaginn 27. febrúar, í Svaðastaðahöllinni á Sauðárkróki, Mótið hefst klukkan 19:00 og er það fyrirtækið Diesel Afl sem býður áhorfendum frítt á viðburðinn. Að þessu sinni er keppt í slaktaumatölti.

Að fyrsta mótinu loknu er það lið Hrímnis sem leiðir í liðakeppninni með 74 stig, lið Hofstorfunnar-550 er með 59,5 stig og Uppsteypa með 57 stig. Vera Schneiderchen er efst í einstaklingskeppni eftir að hafa unnið fjórgang á Feyki frá Selfossi en þau eru á meðal keppenda í slaktaumatölti.

Reynd pör á meðal keppenda

Ef miðað er við niðurstöðu síðasta árs í slaktaumtölti í Meistaradeild KS er ekki að finna mörg af þeim pörum sem þar stóðu á meðal efstu knapa. Af þeim 10 pörum sem ríður til A- eða B-úrslita eru bara tvö pör á meðal þeirra sem skráð eru. Það eru Finnbogi Bjarnason á Eini frá Enni sem urðu í 8.sæti og Elvar Einarsson á Muna frá Syðra-Skörðugili sem urðu í 10.sæti.

Af þeim hrossum sem skráð eru í mótið er það Hagur frá Hofi á Höfðaströnd sem efstur stendur á stöðulista síðasta árs í þessari grein í fullorðinsflokki. Þá keppti á honum Sigrún Rós Helgadóttir og hlaut hæst 7,27 í forkeppni í slaktaumatölti. Annað kvöld er það Þorsteinn Björn Einarsson sem keppir á Hag. Þá er Matthías Sigurðssn skráður til leiks á Víkingi frá Hlemmiskeiði 2 sem faðir hans, Sigurður V. Matthíasson, reið á til B-úrslita í Meistaradeild Líflands fyrir tveimur vikum síðan. Þá hafa Metta Mannseth og Töfri frá Þúfum gert vel í þessari grein og hlutu m.a. 7,42 í einkunn á alþjóðlegu íþróttamóti á Hólum árið 2024.

Fleiri pör eru á listanum sem vel hafa gert þessari grein til viðbótar sem hér á undan eru nefnd. Það verður því spennandi að sjá hvað gerist í þessari grein sem verður að sjálfsögðu í beinni útsendingu á EiðfaxaTV.

Ráslisti