Tangó hlaut tíu fyrir skeið – Miðsumarssýningu lokið á Hellu

Kynbótasýningu á Gaddstaðaflötum lauk nú rétt fyrir hádegi á yfirlitssýningu. Um var að ræða þau hross sem dæma átti á miðsumarssýningu sem fram fór á sama stað fyrir tveimur viku en hætta þurfti við vegna Covid smita. Alls voru 45 hross dæmd þessa vikuna og þar af 43 í fullnaðardómi.

Hæst dæmda hross sýningarinnar er 6.vetra gömu hryssa, Dússý frá Vakurstöðum, sem sýnd var af Teiti Árnasyni en hún er ræktuð af og í eigu Halldóru Baldvinsdóttur. Dússý hlaut fyrir sköpulag 8,64 fyrir sköpulag, 8,60 fyrir hæfileika og 8,61 í aðaleinkunn. Hæst hlaut hún 9,5 fyrir hægt stökk. Faðir Dússýar er Hafsteinn frá Vakurstöðum og móðir er Bjóla frá Feti.

Teitur sýndi einnig hæst dæmda stóðhest sýningarinnar en það var Vonandi frá Halakoti sem líkt og Dússý er 6.vetra gamall. Hann hlaut 8,31 fyrir sköpulag, 8,58 fyrir hæfileika og í aðaleinkunn 8,49. Hæst ber einkunnin 9,5 fyrir tölt. Faðir Vonanda er Arion frá Eystra-Fróðholti en móðir er Álfarún frá Halakoti. Ræktendur eru Einar Öder Magnússon og Svanhvít Kristjánsdóttir sem er eigandi hans.

Tangó frá Litla-Garði hlaut 10,0 fyrir skeið sýndur af Konráði Val Sveinssyni sem fyrr í sumar sýndi Kastor frá Garðshorni á Þelamörk einnig í 10,0 fyrir skeið og eru þetta einu tvær tíurnar fyrir þann eiginleika í ár.

Af öðrum hrossum sem hlutu 9,5 fyrir einstaka eiginleika í hæfileikadómi ber að nefna Fjalladís frá Fornusöndum, sem Elvar Þormarsson sýndi, en hún hlaut 9,5 fyrir skeið. Heilun frá Holtabrún sem Elvar sýndi einnig en hún hlaut 9,5 fyrir tölt. Þá sýndi Steingrímur Sigurðsson Kátínu frá Syðra-Langholti í 9,5 fyrir skeið.

Öll hross á sýningunni raðað eftir aðaleinkunn.