Glæsihross í Hafnarfirði

Fyrri vikunni af kynbótasýningum á Sörlastöðum í Hafnarfirði lauk í dag á yfirlitssýningu. Líkt og á öðrum sýningum kom fjöldi glæsilegra gripa fram. Dómarar voru Víkingur Gunnarsson, Elisabet Jansen og Friðrik Már Sigurðsson.

Af þeim 95 sem komu fram í fullnaðardómi hlaut rétt rúmlega helmingur 1.verðlaun eða alls 50 hross. Til viðbótar við þau 95 sem sýnd voru í reið voru 16 hross sköpulagsdæmd.

Hæst dæmda hross sýningarinnar er Glampi frá Kjarrhólum 9.vetra gamall stóðhestur undan  Arion frá Eystra-Fróðholti og Gígju frá Árbæ. Ræktendur hans eru þeir Bragi Sverrisson og Axel Davíðsson en eigandi eru Gæðingar ehf, sýnandi Glampa var Daníel Jónsson. Glampi hlaut 8,59 fyrir sköpulag, 8,72 fyrir hæfieika og í aðaleinkunn 8,68. Þar af 9,5 fyrir hægt tölt.

Mikla athygli vakti 4.vetra stóðhesturinn Fróði frá Flugumýri sem er sá hæsti dæmdi í sínum aldursflokki í ár. Fróði er undan Hring frá Gunnarsstöðum og Fýsn frá Feti. Ræktendur eru Teitur Árnason og Eyrún Ýr Pálsdóttir en Eyrún er eigandi og knapi. Fróði er klárhestur með 8,45 fyrir sköpulag, 8,31 fyrir hæfileika og 8,36 í aðaleinkunn. Hæfileika einkunn án skeiðs er 8,91.

Fróði frá Flugumýri

Kastor frá Garðshorni á Þelamörk kom til dóms í Hafnarfiði og hlaut m.a. einkunnina 10,0 fyrir skeið en þá einkunn hafði hann hlotið í síðustu viku á Hólum. Hann hækkaði nú einkunn sýna fyrir hæfileika þó nokkuð og er nú með 8,48 í aðaleinkunn.

Pensill frá Hvolsvelli hlaut háan dóm með hvorki meira en minna en 8,98 fyrir sköpulag og þar af einkunnina 9,5 fyrir bak og lend og samræmi og 10 fyrir prúðleika. Fyrir hæfileika hlaut hann 8,32 og í aðaleinkunn 8,55.

Þau hross sem hlutu einkunnina 9,5 eða 10 fyrir einstaka eiginleika á þessari sýningu að undanskildum þeim sem áður hefur verið fjallað um eru eftirtalin:

Hávaði frá Haukholtum hlaut 9,5 fyrir samræmi.

Sjarmi frá Sauðanesi hlaut 9,5 fyrir prúðleika

Kasmír frá Ölduhofi hlaut 9,5 fyrir prúðleika

Heiður frá Eystra-Fróðholti hlaut 9,5 fyrir tölt og samstarfsvilja.

Fjóla frá Eskiholti II hlaut 9,5 fyrir skeið.