Tímar í 100 metra skeiði teknir af stöðulista

Stöðulisti í 100 metra skeiði hefur verið uppfærður í ljósi þess að tímar í þeirri grein á gæðingamótinu á Flúðum teljast nú ekki hafa verið settir við löglegar aðstæður. Samkvæmt þeim stöðulista sem birtist hér á vef Eiðfaxa í september voru þrír af þrjátíu bestu tímum ársins settir á því móti, þar á meðal tími Gyðu Sveinbjargar á Snædísi frá Kolsholti 3 sem var besti tími ársins í greininni, 7,12 sekúndur.

Hestamannafélagið Jökull gaf frá sér yfirlýsingu vegna málsins en í henni segir:

“Opið gæðingamót hestamannafélagsins Jökuls fór fram í lok júlí og að vanda var mikil þátttaka á mótinu og hefur þessi viðburður verið að festa sig í sessi sem feykilega vinsælt mót í mótaflórunni á Íslandi ár hvert. Í kjölfar mótsins kom því miður í ljós að framkvæmd á 100 m. skeiði hafði ekki verið fullnægjandi og mæling brautarinnar ekki farið rétt fram. Tímatökubúnaður var því settur upp á 90m í greininni og er þar mannlegum mistökum um að kenna. 100 m skeið á mótinu uppfyllti því ekki kröfur sem lögleg keppnisgrein þarf að uppfylla og telst því ólögleg. Mótshaldari, mótsstjóri og þeir sem að framkvæmdinni koma harma að svo fór og biðja þá sem hlut eiga að máli og þátttakendur í skeiði velvirðingar á því.”

Samkvæmt nýjum uppfærðum stöðulista er það því Konráð Valur Sveinsson á Kastori frá Garðshorni á Þelamörk sem á besta tíma ársins, 7,19 sekúndur.