Fimm hross hlutu 10 og þrjátíu 9,5 fyrir skeið

Skeið skal sýnt á þeim mesta hraða þar sem hesturinn ræður við að ganga í jafnvægi heila ferð. Full sprettlengd er 150 metrar (75 metrar hjá fjögurra vetra hrossum). Auðveld niðurtaka á skeið af stökki á greiðri ferð, létt taumsamband á sprettinum sem og mjúkleg niðurhæging í jafnvægi eru verkefni sem geta vegið til hækkunar á einkunnum enda sýna þau fram á jafnvægi hestsins og öryggi á sprettinum. Að sama skapi skal einkunn lækka um 0,5 hið minnsta séu miklir erfiðleikar í upphafi spretts, hesturinn þarf mikla hjálp frá knapa til að halda jafnvægi á sprettinum eða ef hesturinn styttir sig í niðurhægingu. Skeiðið telst takthreint ef svif er greinilegt og einungis er um lítilsháttar frávik frá niðurkomu hliðstæðra fóta að ræða.

Þau fimm hross sem hlutu 10,0 fyrir skeið í ár eru Herakles frá Þjóðólfshaga, Hildur frá Fákshólum, Liðsauki frá Áskoti, Mjallhvít frá Sumarliðabæ 2 og Væta frá Leirulæk.

Athygli vekur að Sleipnisbikarhafi ársins í ár, Álfaklettur frá Syðri-Gegnishólum, á fimm afkvæmi sem hlutu úrvalseinkunn fyrir skeið enda stendur hann framarlega í kynbótamatinu fyrir skeið. Þá eiga þeir Adrían frá Garðshorni á Þelamörk og Spuni frá Vesturkoti þrjú hross í þessum hópi.

Þá verður að minnast á Gnýpu frá Leirulæk sem er móðir þeirra Hildar frá Fákshólum og Gnýpu frá Leirulæk sem hlutu báðar 10,0 fyrir skeið.

Tvær fjögurra vetra hryssur þær Orka frá Sámsstöðum og Óskadís frá Steinnesi hlutu 9,5 fyrir skeið en þær eru báðar undan Adrían frá Garðshorni á Þelamörk.