Tvö hross hlutu 10 og fjörutíu og fjögur 9,5 fyrir samstarfsvilja

Samstarfsvilji er mat á framhugsun, þjálni og taugastyrk hestsins í gegnum alla sýninguna, þ.e. hversu fús hesturinn er til að leggja sig fram og bregðast við ábendingum knapans. Fyrir einkunnir 9,0 eða hærra skal það sýnt að hægt sé að hægja hrossið niður á fet í viðsnúningum á brautarendum. Hraðabreytingar á gangtegundum, losað um taum, slöngulínur og annað sem sýnir þjálni og samstarfsvilja getur vegið til hækkunar á einkunn sé það vel framkvæmt af hestinum.

Tvö hross hlutu einkunnina 10,0 fyrir samstarfsvilja á árinu en það eru þau Arney frá Ytra-Álandi og Hulinn frá Breiðstöðum. Arney er fimm vetra gömul undan Skýr frá Skálakoti og Erlu frá Skák og Hulinn er sex vetra gamall undan Kveik frá Stangarlæk 1 og Díönu frá Breiðstöðum.

Flest afkvæmi á listanum á Kveikur frá Stangarlæk 1 alls sex talsins en næst flest afkvæmi á Álfaklettur frá Syðri-Gegnishólum en þau eru 4 talsins.

Fimm 4.vetra gömul hross hlutu úrvalseinkunn fyrir samstarfsvilja en það voru þau Dama frá Hjarðartúni, Katla frá Árbæjarhjáleigu II, Konsert frá Horni I, Miðill frá Hrafnagili og Nótt frá Tjaldhólum.