Sara Dís og Nökkvi mæta til A-úrslita

Síðustu atriði dagsins á Norðurlandamóti í hestaíþróttum voru B-úrslit í þremur flokkum í gæðingakeppni þ.e. B-flokki ungmenna, A-flokki ungmenna og unglingaflokki.

B-flokkur ungmenna

Í B-flokki ungmenna var það hún Sara Dís Snorradóttir á Nökkva frá Syðra-Skörðugili sem efst stóð og tryggði sér þar með þátttökurétt í A-úrslitum með einkunnina 8,69. Næst henni komst Hilma Pettersson frá Svíþjóð á Lauki frá Varmalæk með 8,60 í einkunn. Einn annar íslenskur knapi tók þátt í þessum úrslitum en það var Guðmar Hólm Líndal á Arthúri frá Baldurshaga en þeir hlutu 8,41 í einkunn og er hlutskipti þeirra á Norðurlandamóti því 11. sæti í B-flokki ungmenna.

A-flokkur ungmenna

Í A-flokki ungmenna var það Alma Jonsson á Móa frá Efri-Fitjum sem vann sér þátttökurétt í A-úrslitum með einkunnina 8,32. Önnur varð Rebecca Hesselbjerg Taulborg á Drakúla frá Akurgerði með 8,22. Guðmar Hólm og Leikur náðu sér ekki í A-úrslita sæti.

Unglingaflokkur

Í unglingaflokki var það Andreas Lie Sørensen á Djásn frá Arnbjörgum sem tryggði sér sæti í A-úrslitum með 8,38 en þeir keppa fyrir hönd Noregs.