Opnað fyrir umsóknir í Meistaradeildina 2027

Undirbúningur fyrir keppnistímabilið 2027 í Meistaradeildinni í hestaíþróttum er formlega hafinn. Stjórn deildarinnar hefur opnað fyrir umsóknir liða sem óska eftir þátttöku á komandi tímabili, ásamt því að hvetja staka knapa sem leita að liði til að gefa sig fram. Þetta kemur fram í frétt á vefsíðu deildarinnar.

Í kjölfar umræðna á síðasta aðalfundi er stefnt að þeirri breytingu að fjöldi knapa í hverju liði verði fjórir á keppnistímabilinu 2027. Sú tillaga verður lögð fyrir næsta aðalfund deildarinnar til endanlegs samþykkis í október næstkomandi.

Sjálfkrafa þátttökuréttur og staðfesting

Sex lið eiga vísa setu í deildinni á grundvelli árangurs, en þau þurfa engu að síður að staðfesta þátttöku sína og tilgreina liðseigendur og knapa fyrir tilsettan frest. Liðin með sjálfkrafa þátttökurétt eru:

• Hestvit / Árbakki
• Hjarðartún
• Hrímnir / Hest.is
• IB bílar
• Top Reiter / Sumarliðabær
• Ganghestar / Margrétarhof

Umsóknarferli og frestur

Ný lið sem sækjast eftir þátttökurétti þurfa að senda inn formlega umsókn þar sem fram kemur hverjir skipi knapahópinn og hverjir séu eigendur liðsins.

Einstaklingar sem hafa áhuga á að keppa en eru ekki í liði eru einnig hvattir til að senda inn upplýsingar um sig, en stjórn Meistaradeildarinnar mun koma þeim ábendingum áfram til liðseigenda.
Umsóknarfrestur rennur út 10. september 2026.

Öllum umsóknum og staðfestingum skal skilað á netfangið info@meistaradeild.is.