Ísbjörg frá Blesastöðum efst á Selfossi

Þá er vorsýningum formlega lokið en yfirlit fór fram á þremur stöðum í dag, Selfossi, Hellu og Hólum. Yfirlitið á Selfossi var það síðasta til að klárast. 97 hross voru sýnd á Selfossi og hlutu 90 fullnaðardóm. Dómarar voru þeir Þorvaldur Kristjánsson, Arnar Bjarki Sigurðsson og Halla Eygló Sveinsdóttir.

Ísbjörg frá Blesastöðum 1A er efsta hross sýningarinnar með 8,69 í aðaleinkunn en fyrir sköpulag hlaut hún 8,59 og fyrir hæfileika 8,74. Ísbjörg er undan Spuna frá Vesturkoti og Blábjörgu frá Torfastöðum. Ræktandi er Magnús Trausti Svavarsson og eigandi Anja Egger-Meier. Sýnandi var Árni Björn Pálsson.

Mjallhvít frá Sumarliðabæ 2 hlaut 10 fyrir skeið á sýningunni en það var eina 10 sem var gefin fyrir einstaka eiginleika í hæfileikum. Hún hlaut jafnframt 9,5 fyrir samstarfsvilja en Nótt frá Tjaldhólum og Fáfnir frá Miðkoti fengu það einnig. Kvika frá Hrafnshóli hlaut 9,5 fyrir tölt, stökk og samstarfsvilja. Númi frá Árbæjarhjáleigu II, Álfatýr frá Skíðabakka I, Valíant frá Garðshorni á Þelamörk fengu 9,5 fyrir skeið. Kór frá Kálfhóli 2 hlaut 9,5 fyrir stökk.