Reglur um Gæðingalist hafa verið uppfærðar

Á landsþingi LH sem haldið var í október á síðasta ári samþykkti þingið nokkrar breytingar í reglugerð um gæðingalist sem hafa áhrif á framgang keppninnar í greininni. Uppfærðar reglur um gæðingalist má finna á heimasíðu LH undir Lög og reglur.

Á landsþingi var til að mynda samþykkt að sérstakt Íslandsmót í gæðingalist skuli haldið á vordögum á meðan innanhúsmótatímabilið stendur enn yfir eða fyrir 15. maí og Íslandsmeistarar skulu krýndir á því móti. Hestamannafélagið Sprettur fékk Íslandsmótið í gæðingalist úthlutað fyrir þetta ár og verður mótið haldið í Samskipahöllinni.

Á vef Landssambandsins hefur verið birt góð grein um þær helstu breytingar en þær eru:

Einkunn fyrir fegurð í reið hefur verið færð yfir á flæði og munu því flæði, reiðmennska og fegurð í reið gilda 20% af heildareinkunn, en fegurð í reið var áður hluti af einkunninni fyrir gangtegundir. Með þessari breytingu er gangtegundum gert hærra undir höfði og gilda þær 40%, æfingar eftir sem áður 40% og að lokum flæði, reiðmennska og fegurð í reið sem gilda 20%.

Samþykkt var að vægisstuðlar æfinga, sem hafa vægi hærra en 1,0 fara ekki að hafa áhrif á einkunn fyrr en æfingin nær 5,0 í lágmarkseinkunn og þar að auki verður þak á heildareinkunn æfinga þannig að einkunn fyrir æfingu fer aldrei yfir 10.

Lágmarksvegalengd fetsýningar var stytt í 20 m. í stað 30 m sem. áður var.

Til þess að hljóta fullnaðareinkunn fyrir greitt tölt (7,5 eða hærra) þarf að sýna greitt tölt frá miðju skammhliðar til miðju skammhliðar, þannig að sýna þarf greitt tölt í gegnum tvær beygjur hið minnsta.

Faghópur LH um gæðingalist hefur heimild til þess að endurskoða og gera breytingar á vægi einstakra æfinga ár hvert og hefur faghópurinn nú birt breytt vægi æfinga og má finna það í uppfærðum reglum um gæðingalist. Í stuttu máli má segja að vægi á flestum æfingum hefur verið lækkað, munur á vægi æfinga var minnkaður og bilið á erfiðleikastuðlum þrengt frá því sem áður var. Á 1. stigi gæðingalistar hafa allar æfingar jafnt vægi eða 1,0.

Möguleiki til þess að sækja um frjálsar æfingar er opinn og er þannig að knapi sem óskar að fá frjálsa æfingu metna þarf að skila inn umsókn til LH í gegnum hlekk á síðu sambandsins. Umsóknin þarf samkvæmt reglum um gæðingalist að innihalda skýra lýsingu á æfingunni, útfærslu hennar og rökum ásamt teikningu af æfingunni. Faghópur fær æfinguna til afgreiðslu frá skrifstofu LH þar sem nafn viðkomandi knapa og upplýsingar um hann eru teknar út og hver umsókn er tekin fyrir með nafnleynd. Tekið skal fram að knapa er óheimilt að hafa samband við faghópinn í tengslum við afgreiðslu umsókna og allar athugasemdir skulu þurfa að berast skriflega gegnum skrifstofu LH.