Suðurlandsdeildin byrjar vel

22. janúar 2019
Fréttir

Spennandi keppni og góður hestakostur í fjórgangi í kvöld.

Það var ekki að sjá að hrollur væri í knöpunum og hrossum þrátt fyrir að úti væri 14 stiga frost í janúar þegar Suðurlandsdeildin hélt sitt fyrsta mót nú í kvöld. Hestakostur var mjög góður bæði í flokki áhugamanna og opna flokknum en fyrirkomulagið í deildinni er þannig að áhugamenn og atvinnumenn keppa saman í forkeppni. Að henni lokinni þá eru haldin tvenn úrslit þar sem úr er skorið hver sigrar í hvorum flokknum fyrir sig.

Svenja Kohl og Polka frá Tvennu stóðu uppi sem sigurvegarar hjá áhugamönnum með einkunina 6,67 en hryssan er undan Fláka frá Blesastöðum, fasmikil á gangi og sýndi Svenja frábæra reiðmennsku á henni í kvöld. Í flokki atvinnumanna var það svo Hulda Gústavsdóttir sem bar sigur úr bítum á stóðhestinum Sesar frá Lönguskák með 7,30 og þar kom Hulda enn einu sinni með vel upp settan klárhest sem líklegt má telja að gæti skipað sér í fremstu röð klárhesta í þessari grein á komandi misserum.

Nánar verður fjallað um Suðurlandsdeildina í næsta tölublaði Eiðfaxa.

Þó svo að einstaklingar séu verðlaunaðir eftir úrslit þá er ekki um einstaklingskeppni að ræða heldur liðakeppni. Staðan í liðakeppninni eftir fyrsta kvöldið er eftirfarandi:

1. Krappi 61

2. Fet/Kvistir 58

3. Equesana 55

4. Hemla/Hrímnir/Strandarhöfuð 53,5

5. Heimahagi 46

6. Húsasmiðjan 45,5

7. Ásmúli 42,5

8. Árbæjarhjáleiga/Hjarðartún 38,5

9. Toltrider 38,5

10. Vöðlar/Snilldarverk 36,5

11. Austurás/Sólvangur 31

Niðurstöður Fjórgangur V2 – Opinn flokkur