Opið Gæðingamót Sleipnis – Niðurstöður

Opið gæðingamót Sleipnis fór fram á Brávöllum á Selfossi í gær í brakandi blíðu. Þátttaka á mótinu hefur oft verið meiri en þeir knapar og hestar sem mættu til leiks sýndu góða takta og gleði skein af hverju andliti, enda stemningin létt og ljúf.

Í A-flokki gæðinga varð eftur í úrslitum Bjarmi frá Litlu-Tungu með einkunnina 8,70 sýndur af Sæmundi Þorbirni Sæmundssyni. Efsta hross í eigu Sleipnisfélaga og því handhafi Sleipniskjaldarins sem veittur hefur verið frá því árið 1950 var Gifta frá Dalbæ sýnd af Sigursteini Sumarliðasyni.

Í B-flokki gæðinga stóð uppi sem sigurvegari hin sex vetra gamla Aldís frá Árheimum sem er undan Ölfu frá Blestastöðum 1A og Stála frá Kjarri en hún hlaut hvorki meira né minna en 8,89 í úrslitum knapi á henni Sigursteinn Sumarliðason. Klárhestaskjaldur Sleipnis sem skorin er út af listamanninum Siggu á Grund er veittur eigenda efsta B-flokks hest félagsins sem að þessu sinni er Aldís.

Í B-flokki ungmenna sigraði Unnsteinn Reynisson á Styrk frá Hurðarbaki en í A-flokki ungmenna Dagbjört Skúladóttir á Feykju frá Auðsholtshjáleigu.

Svandís Aitken Sævarsdóttir á Fjöður frá Hríshóli varð efst unglinga með 8,60 í einkunn en hún var með tvö efstu hrossin í forkeppni.

Þórhildur Lotta Kjartansdóttir átti góðu gengi að fagna en hún stóð efst í barnaflokki á Göldrun frá Hákoti með 8,68 í einkunn en þær sigruðu einnig gæðingatölt barna með 8,69 í einkunn.

Í gæðingatölti fullorðinna varð efsta Emilia Staffansdotter á Náttari frá Hólaborg með 8,61 í einkunn.