Góður árangur á Gæðingamóti Íslands

WR Gæðingamóti Íslands lauk í gær á úrslitadegi en mótið var haldið á Sörlastöðum í Hafnarfirði. Keppt var í hefðbundnum greinum gæðingakeppninnar auk gæðingatölts og 100 metra skeiðs.

Sigurbjörn Bárðarson gerði sér lítið fyrir og reið sínum gæðingum til sigurs bæði í A- og B-flokki. Nagli frá Flagbjarnarholti var fákur hans í keppni alhliðahesta og hlaut hann 8,98 í úrslitum en þess má til gamans geta að Skutull frá Hafsteinsstöðum varð annar en það var Sara Sigurbjörnsdóttir sem reið honum til úrslita en Sigurbjörn sýndi hann í forkeppni. Í B-flokki gæðinga var Sigurbjörn á Hrafni frá Breiðholti í Flóa og hlaut hann í úrslitum einkunnina 9,00.

Í 100 metra skeiði náðust frábærir tímar og var það Ingibergur Árnason sem þeim besta náði á Sólveigu frá Kirkjubæ, 7,30 sekúndur.

Í flokki áhugamenna var það Jón Ó. Guðmundsson sem efstur stóð í A-flokki á Glym frá Hofsstöðum í Garðabæ með 8,38 í einkunn. Magnús Ólason lék sama leik í B-flokki á Veigari frá Sauðholti 2 og hlaut í einkunn 8,54.

Ásta Holmfríður Ríkharðsdóttir vann keppni í barnaflokki á Auðdísi frá Traðarlandi með 8,72, Lilja Dögg Ágústsdóttir stóð efst unglinga á hinum margreynda Klerki frá Bjarnanesi og hlaut í einkunn 8,71.

Herdís Björg Jóhannsdóttir var hlutskörpust í A-flokki ungmenna og sigraði á Snædísi frá Forsæti II með 8,46 í einkunn og í B-flokki ungmenna var það Inga Dís Víkingsdóttir sem efst stóð á Ósk frá Hafragili með 8,54.