Elvar hlaut FT fjöðrina

Elvar Þormarsson hlaut FT fjöðrina á Íslandsmóti fullorðinna og ungmenna. Elvar fékk fjöðrina fyrir sýningu sína á Fjalladís frá Fornusöndum í gæðingaskeiði í meistaraflokki. Þau urðu Íslandsmeistarar í greininni þriðja árið í röð og hlutu hæstu einkunn sem gefin hefur verið á Íslandi í gæðingaskeiði 9,0.

Eftifarandi texti var lesinn upp við verðlaunaafhendinguna:

„Verðlaunin eru veitt fyrir einstaka útgeislun knapa og hests.
Hesturinn sé sjálfberandi, sterkur og mjúkur. Reiðmennska
einkennist af samspili og léttleika.“

„FT Fjöðrin er jafnan veitt á stærstu mótum keppnistímabilsins,
Íslands- og Landsmótum.“

„Elvar Þormarsson fær FT fjöðrina fyrir sýningu sína á Fjalladís frá
Fornusöndum í gæðingaskeiði meistara. Saman hafa þau sýnt
yfirburði sína í gæðingskeiði og orðið Íslandsmeistarar þrjú ár í röð.
Sýningarnar einkennast af krafti, léttleika og mýkt. Reiðmennskan
frábær þar sem hún er í senn sanngjörn, án átaka en til mikilla
afkasta. Það geislar af þeim saman á brautinni.“

„Elvar er jafnframt fyrirmynd bæði innan vallar sem utan. Ávallt
prúður og sýnir drenglyndi.“

„Innilegar hamingjuóskir Elvar þú ert sannarlega vel að þessum
verðlaunum kominn!“