Árvakur frá Neðra-Skarði efstur

Kynbótasýningar eru farnar af stað víðsvegar um heim. Á föstudaginn lauk tveggja daga sýningu út í Austurríki, St. Radegund. 35 hross hlutu dóm þar af 32 fullnaðardóm. Sex hross hlutu fyrstu verðlaun. Flest hrossin voru fædd á Íslandi eða 16 talsins, 13 fædd í Þýskalandi og 8 í Austurríki. Dómarar á sýningunni voru þau John Siiger Hansen, Marlise Grimm og Tom Buijtelaar.

Efstur á sýningunni var Árvakur frá Neðra-Skarði en hann hlaut 8,22 í aðaleinkunn. Sýnandi á Árvakri var Þórður Þorgeirsson en hann sýndi 19 hross á sýningunni. Árbakur hlaut 8,18 fyrir sköpulag og 8,24 fyrir hæfileika. Árvakur er 9 vetra undan Álfi frá Selfossi og Ögn frá Eyri.

Kappasonurinn Óskabyr frá Húsavík, 8 vetra, hlaut hæstu einkunn sýningarinnar fyrir sköpulag, eða 8,30 í einkunn og Stormur frá Djúpárbakka, 13. vetra, hlaut hæstu einkunn fyrir hæfileika, 8,35 í einkunn.