Stefnir í spennandi lokakvöld Meistaradeildar

30. mars 2025
Fréttir

Mjótt á munum í einstaklings- og liðakeppni Meistaradeildarinnar

Það voru miklar hrókeringar í einstaklingskeppninni í dag á Skeiðdegi Meistaradeildar Líflands í hestaíþróttum.

Eyrún Ýr Pálsdóttir skellti sér upp í efsta sæti eftir frábæra frammistöðu, 2. sæti í 150 m. skeiði og fimmta sæti í gæðingaskeiði. Stendur hún nú á toppi einstaklingskeppninnar með 43 stig. Aðalheiður Anna hélt öðru sætinu eftir að hafa endað í fjórða sæti í 150 m. skeiðinu. Ásmundur Ernir er nú kominn í þriðja sætið með 39 stig en hann bætti ekki við sig neinum stigum í dag og Þorgeir Ólafsson er orðinn fjórði með 33,5 stig en hann endaði í fimmti í 150 m. skeiðinu og þriðji í gæðingaskeiðinu.

Lið Sumarliðabæjar er enn efst í liðakeppninni með 240.5 stig en hin liðin nálgast óðfluga. Top Reiter og Hjarðartún eru nú 1 stigi neðar, jöfn í öðru sæti, með 239.5.

Það stefnir allt í virkilega spennandi lokakvöld á föstudaginn, 4. apríl, í HorseDay höllinni á lokamóti Meistaradeildarinnar þegar keppt verður í skeiði og tölti.