Hátt dæmd hross á Margareterhof

Það vantaði ekki gæðingavalið á kynbótasýningu sem fram fór í Margareterhof og lauk með yfirlitssýningu í gær. Þar voru 65 hross dæmd og þar af 60 í fullnaðardómi af þeim hlutu 26 yfir 8,00 og 1.verðlaun. Dómarar voru þeir Víkingur Gunnarsson, Friðrik Már Sigurðsson og Guðbjörn Tryggvason.

Áður hefur verið um þær Náttdísi og Pálu vom Kronshof fjallað á vefsíðu Eiðfaxa en þær hlutu feikna háa dóma. Náttdís bætti um betur á yfirliti og hlaut 9,0 fyrir skeið og 10 fyrir samstarfsvilja og hlýtur því í aðaleinkunn 8,96.

Af öðrum hrossum sem dæmd voru á Margareterhof má nefna Olgu frá Lækjamóti II sem hlaut 8,74 í aðaleinkunn. Olga er sjö vetra gömul undan Skýr frá Skálakoti og Hafdísi frá Lækjamóti. Ræktandur Olgu eru Ísólfur Líndal Þórisson og Mona Olsson en eigandi er Kronshof og Anja Egger. Fyrir sköpulag hlaut Olga 8,84 með 9,0 fyrir höfuð, háls, herðar og bóga, bak og lend, samræmi og prúðleika. Fyrir hæfileika hlaut hún 8,68 þar af 9,0 fyrir tölt, samstarfsvilja  og fegurð í reið.

Olga frá Lækjamóti II og Frauke Schenzel. Ljósmynd: Linnea Lindahl

Þá komu einnig eftirtektarverðir stóðhestar fram. Hæst dæmdur þeirra er hinn sjö vetra gamli Mótor från Smedjan undan Viking från Österaker og Minningu från Margareterhof. Hlaut hann fyrir sköpulag 8,48, fyrir hæfileika 8,46 og í aðaleinkunn 8,47. Jafnvígur alhliðahestur með 9,0 fyrir skeið og samstarfsvilja. Sýnandi hans var Caspar Logan Hegardt.

Mótor fran Smedjan og Caspar Logan Hegardt. Ljósmynd: Linnea Lindahl

Þá hlaut hinn 6.vetra gamli Bikar fra Guldbæk 8,37 í aðaleinkunn sýndur af Sigurði Óla Kristinssyni og Stáli från Skáneyland hlaut 8,35 í aðaleinkunn fimm vetra gamall sýndur af Agnari Snorra Stefánssyni.

Stáli fran Skáneyland og Agnar Snorri Stefánsson. Ljósmynd: Mette Lund Lindberg

Líklegt verður að telja að mörg af þessum hrossum sem talin eru upp hér að ofan verði fulltrúar sinna landa á komandi heimsmeistaramóti í ágúst.