Hringdu nýr aðalstyrktaraðili 1. deildarinnar

Það eru spennandi tímar framundan hjá 1. deildinni í hestaíþróttum en nýtt keppnistímabil hefst þann 13. febrúar næstkomandi. Ljóst er að umgjörðin verður vegleg í ár, en fjarskiptafyrirtækið Hringdu hefur gengið til liðs við deildina sem aðalstyrktaraðili. Mun deildin því bera heitið 1. deild Hringdu keppnistímabilið 2026.

Eiðfaxi heyrði í Sigurði H. Örnólfssyni, forsvarsmanni deildarinnar, og spurði hann út í nýja samninginn og veturinn framundan.

Öflugur bakhjarl lyftir deildinni

Sigurður segir samstarfið við Hringdu marka tímamót fyrir mótaröðina. „Það skiptir deildina miklu máli að fá styrktaraðila í samstarf, en að fá Hringdu sem aðalstyrktaraðila mun koma deildinni á nýtt plan,“ segir Sigurður.

Aðdragandi samstarfsins var farsæll en Sigurður bendir á að tenging fyrirtækisins við hestamennsku sé sterk. „Þeir aðilar sem standa að Hringdu eru öflugt hestafólk og þegar forsvarsmenn deildarinnar leituðu til þeirra stóð ekki á svörum,“ bætir hann við og er greinilega ánægður með nýja nafnið á deildinni.

Spenna fyrir nýrri aðstöðu og útsendingum

Keppni hefst eftir tæpar tvær vikur og segir Sigurður undirbúning hafa gengið framar vonum, sem hann þakkar öflugri og samstilltri stjórn. „Spennan er orðin mikil og ég veit að mörg liðanna eru farin að stilla saman strengi.“

Öll mót deildarinnar munu fara fram í nýrri og glæsilegri reiðhöll Hestamannafélagsins Sörla í Hafnarfirði. Sigurður segir aðbúnaðinn þar vera til fyrirmyndar, en ný upphitunaraðstaða mun nýtast keppendum frábærlega. Þá verður sýnt beint frá öllum viðburðum deildarinnar á EiðfaxaTV í vetur. „Nýr útsendingaraðili er kominn að deildinni, en það verður Eiðfaxi og væntum við mikils af þeim,“ segir Sigurður að lokum og kemur jafnframt á framfæri þökkum til allra þeirra sem hafa komið að starfinu.

Keppnisdagatalið 2026 Hér fyrir neðan má sjá dagskrá 1. deildar Hringdu fyrir árið 2026, en veislan hefst með fjórgangi föstudaginn 13. febrúar.

13. febrúar: Fjórgangur V1

27. febrúar: Gæðingalist

12. mars: Slaktaumatölt T2

26. mars: Fimmgangur F1

09. apríl: Tölt T1 og 100m skeið

18. apríl: Gæðingaskeið (Lokamót)

Tryggðu þér ársáskrift að EiðfaxaTV strax í dag og fylgstu með hestaíþróttum í beinni útsendingu, gramsaðu í gullkistunni, þar sem mikið af eldra efni er að finna, og njóttu íslenska hestsins!