Elimar og lið ISI Pack sigurvegarar dagsins

Fyrsta mótið í Meistaradeild Líflands og æskunnar fór fram í dag í Lýsishöllinni í Reykjavík. Keppt var í fjórgangi og alls voru það 40 knapar sem tóku þátt frá 10 mismunandi keppnisliðum. Í þessar deild keppa knapar á aldrinum 13-18 ára og eru í haust tíu ár frá stofnun deildarinnar sem óhætt er að segja að hafi lyft keppendum í þessum aldursflokki á hærra stig.

Sigurvegari dagsins var Elimar Elvarsson á hryssunni Sölku frá Hólateigi, en Elimar keppir fyrir lið ISI Pack. Þau leiddu að lokinni forkeppni með einkunna 6,90 og héldu þeirri forystu í úrslitum og uppskáru þar einkunnina 6,97. Annar varð liðsfélagi Elimars, Gabríel Liljendahl Friðfinnsson sem sat Litrík frá Miðengi. hlaut hann 6,70 í forkeppni og 6,87 í úrslitum. Jafnar í þriðja til fjórða sæti urðu svo þær Álfheiður Þóra Ágústsdóttir á Óskamey frá Íbishóli og Kristín Eir Hauksdóttir Holaker á Þyt frá Skáney með einkunnina 6,83 í úrslitum.

Stigahæsta liðið í fjórgangi var lið ISI Pack en auk þeirra Elimars og Gabríels eru liðsmenn þess Elsa Kristín Grétarsdóttir og Jórunna Edda Antonsdóttir sem báðar kepptu til B-úrslita. Stórgóður árangur hjá þeim að allir knapar skuli hafa komist í úrslit.

Næsta mót fer fram 22.febrúar þegar keppt verður í slaktaumatölti í reiðhöll Hestamannafélagsins Sörla að Sörlastöðum.

Niðurstöður í fjórgangi