Álfur og Óskar kveðja Ísland

22. október 2012
Fréttir

Álfur frá Selfossi kvaddi Ísland í dag en hann hélt út til eiganda síns Christinu Lund í morgun, en Cristina er búsett í Noregi.

Sögu Álfs þekkja flestir en hann er fæddur 2002 og er undan Orra frá Þúfu og Álfadís frá Selfossi. Hæstan dóm hlaut Álfur á Landsmóti 2006, þá 8,46 í aðaleinkunn og á Landsmóti 2011 hlaut hann fyrstu verðlaun fyrir afkvæmi. Álfur hlaut Sleipnisbikarinn nú í ár á Landsmótinu. Hann hefur nú þegar sett sitt mark á ræktun hrossa á Íslandi en hægt er að sjá víðsvegar hross með rauðan haus og rauða lend.

Ekki nóg með það að Álfur sé farin til Noregs en með honum í för var Óskar frá Blesastöðum 1A en Nils Christian Larsen mun taka við þjálfun hestisns með keppnisþátttöku að markmiði. Óskar hefur heillað á keppnisbrautinni í ár undir stjórn Artemisiu Bertus. Þau sigruðu m.a. fjórgang Meistaradeildar, urðu sjöttu í töltkeppni Landsmótsins og í 6. sæti á Íslandsmótinu. Hann er einn þriggja hrossa sem hlotið hefur einkunnina 10 fyrir hægt tölt í kynbótadómi.

Óskar er í eigu hrossaræktarstöðvarinnar Sunnaholt. Nafn Sunnaholts hefur borið oft á góma hestamanna undanfarið ár. Hross í eigu þess hafa vakið eftirtekt í sýningum og á mótum og fréttir af kaupum Sunnaholt á fleiri hrossum hafa ratað í ljósvakamiðla. Færri þekkja til fólksins að baki nafninu eða hinni fjölbreyttu starfsemi sem hjónin Steffen og Angelika Langaard standa að. Viðtal við Steffen og Angeliku verður í 7. tbl. Eiðfaxa sem kemur út í næstu viku.